सुजन प्रेमी
बागलुङ, २७ साउन २०७९ ।
बागलुङको राङ्खानीमा वित्तीय साक्षरता तथा प्रविधि शिक्षा तालिम सम्पन्न भएको छ । सिवाईसी बचत तथा ऋण सहकारी संस्था बागलुङको आयोजनामा जैमिनी नगरपालिका-१० राङ्खानीको रुम्टामा बिहिबार सहकारी शिक्षा तालिम सम्पन्न भएको हो ।
शेयर सदस्य तथा इच्छुक गैर शेयर सदस्यहरुको लागि समेत सहकारी शिक्षा अन्तरगत वित्तीय साक्षरता तथा प्रविधि शिक्षा तालिम सम्पन्न भएको सिवाईसी बचत तथा ऋण सहकारी संस्था जैमिनी सेवा केन्द्र कुश्मिसेराका संयोजक कृष्ण प्रसाद रिजालले जानकारी दिनुभयो । सिवाईसी सहकारी सबैको सहकारी भएकाले यसले सबैलाई समेटेर कार्यक्रम सञ्चालन गरेको उहाँको भनाई छ ।
वित्तीय साक्षरता तालिममा सिवाईसी बचत तथा ऋण सहकारी संस्थाका प्रमुख कार्यकारी अधिकृत नवराज शर्माले सहजिकरण गर्दै कमाउनु भन्दा बचत गर्नु ठुलो कुरा भएकाले बचत गर्ने बानीको विकास गर्नुपर्ने बताउनुभयो । कमाई अनुसार खर्च बढ्दै जाने र अत्यावश्यक बाहेक अन्यत्र खर्च गर्दा पछि आवश्यक पर्दा अरुसँग सहयोग माग्नुपर्ने उहाँको भनाई छ ।
कमाइको केहि रकम बचतका लागि छुट्याएर मात्रै खर्च गर्ने बानी बसाल्नुपर्ने भन्दै उहाँले खर्च गरेर बँकी रहेकोलाई बचत गर्ने बानी हटाएर बचतबाट बचेकोलाई खर्च गर्नेुपर्नेमा जोड दिनुभयो ।
कार्यक्रममा सहभागीको तर्फबाट जैमिनी नगरपालिका-९ पैयुँथन्थापका राम प्रसाद शर्माले सिवाईसी सहकारीले शेयर सदस्यहरुको मनोभावना बुझेर सहकारी शिक्षा दिएको प्रति धन्यवाद ज्ञापन गर्नुभयो । कमाउने र खर्च गर्ने बानी परेकाहरुले बचतको महत्व बुझेर भोलीका दिनलाई सहज बनाउन सक्ने भएकाले यस्ताखाले शिक्षा आवशयकता रहेको उहाँको भनाई छ ।
कार्यक्रमको अवसरमा नयाँ बनेका शेयर सदस्यहरुलाई स्वागत गरिएको थियो ।
